Presentamos a Editorial TERRUM, un novo proxecto impulsado pola Fundación TERRUM co propósito de dar voz a quen non a ten, promover a tradución ao galego de obras de interese social e cultural e apoiar a literatura e as autoras e autores noveis.
Queremos construír, en definitiva, unha ferramenta fermosa e transformadora, baseada na palabra, no pensamento crítico e no amor polos libros.
A Editorial TERRUM inicia a súa andaina coa publicación dunha obra xa clásica e imprescindible: Fuxe, home, fuxe, de Xosé Tarrío. Esta nova edición conta cun prólogo de Fran del Buey Fernández e está adicada á memoria de Cándido Soria, Xaquín Yebra Pimentel e Dominga González Vieites.
O libro foi impreso por Arde Gráfica, un proxecto apaixonante dedicado ao deseño e á impresión gráfica.
Podedes adquir a versión en papel, ao prezo de 15 euros, a través da nosa páxina web ou directamente no local da Oficina de Dereitos Sociais.
O pagamento podese realizar mediante:
- Bizum: 698 18 71 95
- Transferencia bancaria: ES87 2080 0315 8930 4001 8049
Lembrade que coa compra deste libro non só apoiades á Editorial TERRUM, senón que contribuídes tamén a soster os múltiples proxectos sociais, culturais e comunitarios que desenvolvemos desde Portomouro, Vite, O Saviñao. Euskalerría e dende o resto do mundo.
Con todo, poñemos á vosa disposición a versión dixital do texto, por se non vos é posible adquirir o libro físico. A cambio, agradecémosvos que difundades a iniciativa.
Durante os días nos que estabamos falando de reeditar o libro de Xosé Tarrío con motivo do 20.º aniversario da súa morte —con gran enerxía por parte do Oscarín—, resultou que se deu unha confluencia de enerxías e persoas que permitiu relanzar, unha vez máis, o soño de montar unha editorial propia, que levase aparellada mesmo a impresión dos libros, ben por nós mesmas, ben contando con algunha desas «marabillosas iniciativas» de compañeiras que se queren lanzar a aquilo de ter un medio propio de expresión.
A cousa ía rápida: falamos con amigas, debatemos… A presenza do Buter nunha das súas viaxes deixou todo disposto para, «unha vez máis», tentar «facer libros» con agarimo, esmero, elegancia, criterio… Alí, entre conversas marabillosas, xurdiu a idea de xuntar unha equipa de editoras que marcase un pouco o catálogo e os criterios das cousas que se habían publicar. Tamén se falou de máquinas, imprentas, espazos e deseños. O Álex e o Buter aplicaron xenerosamente toda a súa enerxía vital, e xa só faltaba o pistoleirazo de saída, que sería a reedición deste libro por parte da Fundación TERRUM e, con ela, a constitución formal da súa editora: Editorial TERRUM.
Todo estaba en marcha, coma un foguete a piques de se lanzar a explorar o noso satélite. Todo? Todo non. De novo, non contabamos coa señora da gadaña e co seu desapiadado xeito de apañar a «herba dos camiños», pois amencemos coa triste nova da morte do compañeiro e amigo Cándido Soria,, e dese xeito o soño todo deitou segado… pero, ao mesmo tempo, toda seitura deixa a semente dun novo ciclo e anuncia aquilo que ha renacer; nesta ocasión, honrando a memoria das persoas que camiñaron antes ca nós por estes mesmos camiños.”